Vanhasta uutta

Mie tykkään kierrättää ja tehä vanhasta uutta. Ja nyt niitä onki tullu jotaki taas tehtyä:


Meän perheen rinsessala oli menny mekko pieneksi, joten äiti teki uuen ko kerhossa on kevätkarnevaalinaamiaiset parin viikon päästä. Pinkki osa on alennuksesta (0,5€) minun syksylä ostama "tavotemekko" eli mekko johon piti pyrkiä kesäksi synnytyksen jälkheen. Nooh, se tippu päältä jo tammikuussa, joten jouti uusiokäythöön. Koska yläosa on erittäin kapea ja joustava, ei tarvinu ko vähä ottaa sisäle yläosasta ja laittaa olkaimet (meän rinsessa ei ole mikhään rimpula...). Olkaimet on pikkumiehen vanhan sänkykatoksen kiinnitysnarut. Rinssessa halusi samanlaisen yläosan ko Disneyn prinsessoila ylheensä on, ja se totteutethiin eelä mainitun sänkykatoksen harsomaisesta materiaalista. Taakse ompelin harson kiini ja eestä se laitethiin kiini äitin paiasta leikatuila (niilä, joila paian saa henkahriin nätisti) kiiltävillä nauhoila, jotka ommelthiin mekhoon. Ko harsoa vielä jäi, tekasin myös alushamheen. Nätti tuli ja rinsessa on tyytyväinen :) Eikä tosihaan maksanu ko sen mekon hinnan, puoli euroa.

Mietimä muutama viikko sitte herra Yrittäjän kans, että miten etheisseen sais lissää takkinaulakoita ko se ainoa on aina täynä eikä lasten hoitorepuile, aurinkolaisela, pienile takeile ja pyöräilykypärille ole paikkaa. Kuvassa näkyvä kaappi oli niile (ja kaikile muilekki ulkoilukampheile) tarkotettu, mutta käytännössä kläpit on kaivahneet semmosta helppoa naulakkoa, ettei tarttis aina kaaphiin änkeä ( ko son aina täynä ja sekasi eikä sieltä löyvä mithään). Mietintä tuotti parin yön jälkheen tulosta ja tässä se nyt on:


Yks aamu herätessä tuli miehleen, että miehän säästin ne makkarin kaapinovien vanhat nupit (ko vaihoima modernimmat vetimet)! Eli ei muuta ko pora kätheen ja nupit kaapin pääthyyn. Tuli käytännöllinen eikä pyöri ennää kypärät, reput ja pussukat jaloissa (kuvassa niitä ei näy myöskään ko kaksoset läks reissuun just, mutta idea varhmaan selvis). Ja taas toethiin, että aika tavaran kaupittee!


Tämäki vanha kaappi sai uuen elämän herra Yrittäjän käsittelyssä. En muista jäikö tämä esittelemättä silloin perintökalleusten joukossa, ko en ainakhaan tätä misthään postauksesta löytäny. Tämänki on minun isopappa tehny aikahnaan. Värilthään se ei meile oikeen passannu, mutta nyt passaa:


Siinä se tönöttää taas etheisessä omala paikahlaan :)

Seuraavassa postauksessa taas jotaki uutta...
- Piituski-

Kommentit

  1. Jo vain rinsessan passaa keikistellä tuossa mekossa kevätkarnevaaleissa!

    VastaaPoista
  2. Ihana mekko! Eikä ollu kallis :) Nupit on käteviä kaappien sivussa, ko ne kaapit ruukaa olla aina niin tupaten täynnä. Eteisen kaappi sai ihan selvästi uuden elämän :)

    VastaaPoista

Lähetä kommentti

Kiitos ko jätit kommenttia :)

Suositut tekstit